Kun ikaw first-timer sa pagbyahe sakay sa eroplano, isa gid sa ginakalangkagan mo ang pagpanghangaw-hangaw sa mga panganod, pag-enjoy sa sunrise ukon sunset, ukon bisan pa pag-inom-inom sa imo kape samtang nagahulat nga makaabot sa imo destinasyon.
Kun naanad ka naman sa eroplano, siguro gusto mo lang magpahuway ukon magpiyong-piyong samtang naga-byahe.
Apang wala gid siguro sang nanamian nga magtinir sa comfort room sa bilog nga byahe, ilabi na kun masobra sa isa ka oras!
Pero amo sini ang natabo sa isa ka pasahero sa India sang nagsulod ini sa comfort room, apang wala na naka-guwa bangud sa pag-malfunction sang puertahan!
Halin ang lalaki sa syudad sang Mumbai kag pakadto kuntani sa syudad sang Bengaluru — byahe nga nagalawig sang 105 minutos. Naghalin sila sa Mumbai sang pasado las dos sa kaagahon.
Ginpahayag nga nakapadala man ang pasahero sang distress call kag naghulag man ang crew agud buligan siya sa sulod sang CR apang indi gid mabuksan ang lock.
Sang ulihi, may ginpalusot nga gamay sa papel sa comfort room kun sa diin ginsilingan ang pasahero nga indi mabuksan ang puertahan apang indi ini dapat mag-panic.
Gin-abisuhan man ang pasahero nga magpungko lamang bangud kun makahugpa na ang eroplano, magatawag sila sang engineer agud mabuksan ang puerta.
Sang nag-abot na sa airport, ginpasulod matuod ang duha ka engineer kag ila ginguba ang puerta.
Ginpahayag nga yara sa state of shock ang lalaki kag ginhatagan man ini sang medical support.
Nagtanyag man ang airline company sang full refund bangud indi nangin maayo ang eksperyensya sini sa byahe.
Wala na sang madamo nga detalye nga ginpaguwa ang airline apang nag-isyu ini sang public apology bangud sa amo nga hitabo.
