May mga tion gid nga indi kita kumporme sa aton nga gunting ilabi na kun lain nga barbero ang nagapangamot sa aton nga buhok.
Kun amo sini ang sitwasyon, ano ang imo nga ginahimo? Gina-ugtom mo bala ang kalain sang buot, ukon indi ka mahim-os tubtub indi ka makabalos?
Sa Pattaya, Thailand, agaw-atensyon gid ang isa ka turista nga puerte ang singkal sang kaakig sang wala nagsanto ang iya haircut sa gusto sini makit-an sa espiho!
Ini nga Russian tourist ang nagmato-mato sulod sa isa ka barbershop kag bangud wala sang makahangop sa iya panghambal kag wala man ini naga-English, gin-senyas-senyas lamang sini sa barbero kun ano nga iya luyag nga haircut.
Sang natapos na kag ginlantaw na sini sa espiho ang iya itsura, gulpi ini nga nag-huramentado, makapila ka beses nga ginsumbag ang lamesa, kag ginbuyayaw man sini ang naggunting sa iya.
Sang ulihi, ginpudyot sini ang gunting kag siya mismo ang nag-utod sa buhok sang barbero antes ini nagdali-dali guwa sa barbershop nga wala gid sang ginbilin nga bayad.
Suno sa 32-anyos nga barbero nga ginhingadlan nga si Suphachai, naakig man siya sa ginhimo sang turista apang wala na siya nagbalos bangud ginapaminsar gid niya kun ano ang matabo sa iya pananglitan magbato siya — una, posible nga makasuhan siya, kag ikaduha, posible nga madulaan man siya sang obra.
Napilitan man si Suphachai nga i-shave na lamang ang iya bilog nga ulo, bangud daw pal-ak lantawon ang iya gunting nga kahimuan sang turista.
May ginpasaka man nga reklamo sa local police kag nagalaum siya nga makabati sang bisan sorry lang kuntani halin sa kustomer — tinaga nga imposible na sini nga mabatian ilabi na bangud nagbiya na sa Thailand ang amo nga turista.#
(GETTY IMAGES)
