Labi pa nga ginakalangkagan ang Paris Olympics matapos ginsapubliko sang organizers nga espesyal ang mga medalya nga batunon sang mga tagdaog subong nga tuig!
Suno sa organizers, ang tanan nga 5,084 ka mga medalya sa Paris Games ang maga-feature sang metal medallion nga iga-set kaangay sang gemstone kag iga-desinyo sang elite French jewelry house nga Chaumet.
Tanan man ini nga medalya ang butangan sang hexagon-shaped nga gamay nga iron nga halin mismo sa original nga Eiffel Tower nga natukod sang 1889 kag popular indi lamang sa Paris, France kundi sa bilog nga kalibutan!
Tuman ini ka espesyal nga kombinasyon para sa organizers — gold, silver, kag bronze — nga butangan pa sang halin mismo sa Eiffel Tower nga amo naman ang ginakabig pinakamalahalon nga metal nga amo nga pungsod.
Nahibaluan nga tuman gid ka partikular ang mga tagpalasakop sa desinyo sang medal, logo, mascots, kag sa opening ceremony sa kada ginahiwat ang Olympiada.
Ang tanan nga metal nga gingamit sa Paris medals nga nagabug-at sang halos tunga sa kilo ang gin-recycle lamang.
Kaangay man ini sa gingamit sa Tokyo Olympics kun sa diin ginpangtipon sang Japanese organizers ang recycled metal nga halin pa sa consumer electronics kaangay sang mobile phones kag laptops.
Balantayan ang Paris Olympics sa Hulyo 26 tubtub sa Agusto 11 samtang ang Paralympics naman ang naka-schedule sa Agusto 28 tubtub sa Septyembre 8.#
(via Olympics.com)
