Nagahilapit na naman ang Olympiada kag pat-od nga kadamo naman sang mga espesyal nga hitabo ang aton bantayan!
Isa diri amo ang oldest living French Olympic medalist nga amo ang magadala sang sulu sa Paris Olympics subong nga tuig.
Ini amo si Charles Coste, isa ka cyclist nga nagtungtong na sa edad nga 100-anyos sang nagligad lamang nga Pebrero 8.
Nabun-ag siya sang 1924 ukon ang tuig nga katapusan nga nangin host ang Paris sa Summer Olympics.
Kilala si Coste nga nagdaog sang track cycling Olympic gold kaupod sa tatlo ka iban pa nga sanday Pierre Adam, Serge Blusson kag Fernand Decanali sang 1948 Summer Games nga ginpatigayon sa London, United Kingdom.
Malawig ang lista sang mga medalya nga naangkon sini nga nakuha pagkatapos sang Olympiada lakip na ang medalya nga hatag mismo ni anay President Vincent Auriol.
Apang para kay Charles, ang pinaka-malahalon nga medalya nga iya nabaton amo ang halin sa Olympics.
Ginsiling sini nga sang nagkampyon sila sang 1948, gamay lamang ang podium, nabutang pa ang medalya sa box kag wala ginpasuksok sa ila liog, kag indi kaangay sa nakaandan nga iga-play ang national anthem sang pungsod nga ginhalinan sang winner, wala man na-play ang national anthem sang France sang amo nga tion bangud indi makit-an sang organizers ang disc.
Labaw sa tanan, ginakabig man nila nga break ang Olympiada sang amo nga tuig bangud amo ini ang tion kun sa diin may food ration tickets pa sila kasunod sang World War II.
Bugal man para kay Charles kag sa iya mga kaupdanan nga irepresentar ang France sang 1948 nga lima ka tuig pa lamang nga nahilway gikan sa German occupation.
Sa maabot nga Summer Games, may gamay nga pagpangduha-duha ang amo nga cycling legend bangud nagapalanakit ang iya tuhod, apang isa lang ang iya sigurado: bugal para sa iya nga himuon ini kag handurawon ang nagligad sang sila pa ang naga-compete para sa ila pinalangga nga nasyon.#
Photo: Reuters
