Indi kinaandan ang kaso nga gin-imbestigaran sang mga pulis sa Missouri sa Estados Unidos sang Amerika kun sa diin isa ka may edad na nga lalaki ang gin-alegar hungod nga nagpa-utod sang iya nga tiil agud nga maka-avail sang insurance.
Suno sa Howell County Sheriff’s Office, Nobyembre sang nagligad nga tuig sang nadulaan sang tiil ini nga 60-anyos nga residente sang Willow Springs bangud nga na-involve ini sa isa ka brush hog accident.
Ang brush hog amo ang rotary mower nga amo ang ginatakod sa traktora.
Sa istorya sang lalaki, naaksidente siya sa amo nga equipment kag duha gid ka tiil niya ang nadula sa iya.
Apang talalupangdon bangud wala nagasanto ang istorya sini.
Una, nadula ang iya mga tiil — as in, literal nga nadula nga indi na gid makita kun sa diin na ini dapit matapos nga gin-alegar nga nautod!
Ikaduha, natingala man ang otoridad bangud daw kalimpyo gid sang pilas sang amo nga lalaki nga daw kaangay nga indi tuga sang aksidente.
Ikatatlo, nahibaluan man nga paralyzed na ang amo nga tawo gani indi mahangpan kun paano ini nakapalapit sa brush hog.
Sang ulihi, nadiskubrehan sang pulis nga may nakabisita sa balay sang tawo kag gina-alegar nga amo ang nag-chop sang iya nga tiil — nga may bayad.
Nabuyagyag man sang ulihi nga gusto sang tawo nga maka-avail sang insurance, kag bangud nga paralyzed man siya kag indi naman mapuslan ang iya nga tiil, ginpinsar niya nga ipautod na lang ini kag ipaguwa nga aksidente.
Apang bangud wala pa man naka-file ang tawo sang claim sa insurance company, wala pa sang rason nga kasuhan ini.
Pigado ang pag-execute sang iya plano suno sa pulis bangud kadamo gid sang nakit-an nga palpak —apang ginakabig naman ini sang otoridad nga una nga bes pa lamang nila nga na-encounter.
Magluwas nga indi pa ini maka-claim sang iya plano nga insurance, gindala pa sa ospital ang amo nga tawo agud nga madapatan sang husto nga pagbulong ang iya nga pilas.#
(Photo: ISTOCK)
