Nangin tuman ka daku ang selebrasyon sang basketball fans sa Japan matapos nga nalutos na gid man sang ila pungsod ang China sa isa ka major international basketball competition sa labing-una nga tion sa sulod sang halos siyam ka dekada!
Ini paagi sa pagpangibabaw sang Akatsuki Five batok sa Chinese team nga Team Dragon, 76-73, nga amo man ang rason nga nagsaka sa 2-0 ang ila nga rekord sa Group C sa una nga window sang FIBA Asia Cup Qualifiers.
Si Yudai Baba nga nakahampang anay sa Texas Legends sa NBA G League ang nakabubo sang 24 points kag amo ang nagpanguna sa Japanese team agud nga lutuson ang China sa labing-una nga tion halin sang natabo ang 1936 Olympics sa Berlin, Germany — ukon 88 ka tuig na ang nakaligad.
Suportado man ini sang naturalized big man nga si Joshua Hawkinson nga may double-double sang 14 points kag 12 rebounds, samtang si Yuki Kawamura naman ang nakapaulan sang 12 points.
“It was our first win [against China] after 88 years and as Coach said, it was a great win today. One of the positives of this game was that we were able to play physically throughout the whole game, for 40 minutes,” pahayag ni Baba kasunod sang ila sambuwa sa atubang sang Japanese fans sa Ariake Coliseum sa Tokyo.
Nahibaluan nga antes ang hampang sa Window 1 sang Domingo, Pebrero 25, nakalab-ot na sa 14 ka beses nga nagsumalangay ang banas sang China kag Japan sa Asia Cup.
Sang tuig 2021 lamang, apat ka beses gid nga nag-atubangay ang duha ka teams sa sulod lamang sang anum ka bulan sa Asia Cup Qualifiers kag World Cup Qualifiers. Sa amo nga mga sambuwa, wala sang bisan isa ka bes nga natumba sang Japanese team ang national team sang China.#
(Photo: FIBA)
