Matapos nga ginpangunahan ang Gilas Pilipinas sa hampang batok sa Hong Kong kag Chinese Taipei sa first window sang FIBA Asia Cup Qualifiers, atenderon anay ni Justin Brownlee ang mga tanyag sa iya nga maghampang sa guwa sang pungsod.
Suno kay Gilas Coach Tim Cone nga amo man ang coach ni Brownlee sa Barangay Ginebra, gina-check na subong sang 35-anyos nga naturalized import ang mga offer sa iya sang overseas nga mga liga apang wala man ini sang kaso bangud All-Filipino ang mga sambuwa sa idalom sang Philippine Basketball Association (PBA) nga magasugod subong nga semana.
Sa bahin sang Gilas Pilipinas, malawig man ang pahuway bangud sa Hunyo pa ang masunod nga hampang bilang preparasyon sa Paris Olympic Qualifying Tournament batok sa Latvia kag Georgia.
“There are offers for him to go play overseas since it is All-Filipino. We’re perfectly fine with that. We’re all for him going out, and staying in shape. He’s already locked in for us next season so we’ll see him here,” pahayag ni Cone.
Matandaan nga ang hampang ni Brownlee batok sa Chinese Taipei sang Domingo, Pebrero 25, amo man ang una sini nga pagtapak sa home court sa sulod sang 10 ka bulan.
Ini bangud wala man siya nakahampang para sa Barangay Ginebra sa PBA Commissioner’s Cup bangud gindagdagan ini sang suspensyon sang naglagbong ini sa doping test kasunod sang gold medal win sa Asian Games sang Oktubre 2023.
Naka-upod anay si Brownlee sa players sang Mexico, Italy, France, kag Lebanon antes ini nakasulod sa Ginebra sa PBA kag nagahampang na sa atubang sangPinoy fans sa sulod sang halos isa ka dekada.
