Nahimo nga kalaham-utan sa atubang sang iya nga mga kasilingan ang isa ka lalaki nga nagpangawat sang kabayo kag nagtuyo nga taguon ang sapat sa sulod sang iya apartment!
Natabo ini sa Wejherowo, Poland kun sa diin nakabaton ang pulis sang tawag nga nagapangayo sang bulig bangud may lalaki kuno nga may dala nga kabayo kag ginapasaka ini sa ikatatlo nga panalgan sang ila nga apartment building.
Sa una, daw indi pa magpati ang pulis kag nasal-an pa nga prank lamang ang tawag… bangud ano abi ang himuon sang kabayo sa sulod sang kuwarto sa apartment?
Apang wala gid nagakadlaw ang caller rason nga nagpadala sang personnel ang pulis agud hibaluon kun ano ka matuod ang report.
Naabtan sa area ang isa ka 19-anyos nga lalaki nga may dala matuod nga kabayo kag ginapasaka sa hagdan apang daw may eskandalo pa nga nagakatabo bangud ginabais sini ang mga tawo nga nagapugong sa iya.
Suno sa District Police Headquarters sa Wejherowo, natukiban sang ulihi nga kinawatan gali ang kabayo kag gusto sang lalaki nga taguon ini anay sa iya nga kuwarto.
Wala man sini napinsaran kun daw ano ka obvious ang iya nga ginhimo, ukon kun ano ayhan ang himuon sini sa sapat pananglitan makalab-ot gid man sila sa ikatatlo nga panalgan.
Ginbanta sang pulis nga yara sa P213,000 ang balor sang kabayo.
Ginbalik man ang sapat sa iya nga tag-iya, kag didto nahibaluan nga na-report na sini nga ginkawat gid man ang iya nga hinuptanan.
Para naman sa “genius” nga lalaki nga nagmato-mato sa iya operasyon-kawat-kabayo, posible ini nga ma-preso sang tatlo ka bulan ukon tubtub sa lima ka tuig bangud sa kaso nga theft.#
