Gin-report sang National Disaster Risk Reduction and Management Council (NDRRMC) nga nagdangat na sa P865.16-million ang balor sang halit nga ginbilin sang El Niño phenomenon sa crop sector sa Pilipinas.
Lakip sa pinakaapektado nga pananum suno sa ahensya amo ang humay, mais, high-value crops, kag livestock kun sa diin nagalapad ini sang 13,521 ka ektarya sang kadutaan.
Suno pa sa report sang opisina, naglab-ot na sa 15,341 ka mga mangunguma sa bilog nga pungsod ang apektado bangud sa amo kainit nga tyempo.
Bilang bulig naman sa mga apektado sang phenomenon, nakapanagtag na ang Department of Agriculture (DA) sang P362,564,850 nga balor sang assistance.
Sa pihak nga bahin, ginsiling naman sang Philippine Atmospheric, Geophysical and Astronomical Services Administration (PAGASA) nga posible ma-igu na sang drought ang 30 ka mga lugar sa pungsod sa katapusan sang Marso bangud ginakulang gid sa tubig halin pa sang Oktubre 2023.
Ang drought amo ang ma-eksperyensyahan sa tatlo ka sunod-sunod nga bulan nga tuman ka talagsa ukon indi normal ang pag-ulan ukon may 60% nga buhin ipaanggid sa nakaandan nga bubo sang ulan.
Suno kay Climatology and Agrometeorology Division Officer-in-Charge Ana Liza Solis, 25 areas diri sa Luzon kag lima naman sa Visayas.
Lakip sa namensyonar amo ang Abra, Apayao, Aurora, Bataan, Benguet, Cagayan, Cavite, Ifugao, Ilocos Norte, Ilocos Sur, Isabela, Kalinga, La Union, Laguna, Mountain Province, Nueva Ecija, Vizcaya, Occidental Mindoro, Oriental Mindoro, Palawan, Pangasinan, Quirino, Rizal kag Zambales.
Sa Visayas, ang ginhingadlan nga maapektuhan amo ang Antique, Guimaras, Iloilo, Leyte, kag Negros Occidental.
Gindugang sang ahensya nga posible pa nga maglain ini nga forecast kag posible nga madugangan ang mga areas nga yara sa listahan.#
(Photo by Yancy Lim)
