Ginkumpirma sang talent agency sang real-life celebrity couple nga sanday Catriona Gray kag Sam Milby nga nagapangatubang ang duha sang pila ka mga pagpanghangkat sa ila nga relasyon apang ginatinguhaan pa sang mga ini mga ma-resolba kun ano man ang problema.
Ginpaguwa sang Cornerstone Entertainment ini nga statement sa tunga sang nabanhaw nga espekulasyon nga bulagay na ang beauty queen kag ang hunk actor umpisa pa sang una nga semana sang Enero.
Sa statement sang talent agency, ginhingyo man sa publiko nga hatagan anay sang privacy ang duha samtang yara sila sa nasambit nga sitwasyon.
“While it is true that Sam and Catriona are currently facing some challenges in their relationship, they are actively working on resolving these issues together. We kindly request that everyone respect their privacy during this time as they navigate through this situation. We appreciate the concern and well-wishes from all those who have shown support for the couple,” kabahin sang statement.
Apisar wala sang direkta nga kumpirmasyon sa breakup, madamo ang nagpati sa espekulasyon nga bulagay na matuod sanday Sam kag Cat bangud wala na ginasuksok ni Cat ang engagement ring.
Apang ini nga isyu ang ginbali man sang beauty queen paagi sa pag-post sang iya nga furbabies kag gin-tag pa si Sam. Sang nagligad nga semana, spotted man ang duha nga magkaupod sa isa ka industry event kaupod sa actress nga si Isabel Oli.
2020 sang ginsapubliko sang duha ang ila nga relasyon; na-engage sang Pebrero 2023; kag nagaplano nga magpakasal subong nga 2024.#
