Bangud Leap Day subong nga adlaw, espesyal ini para sa mga tawo nga natuon sa Pebrero 29 ang ila nga kaadlawan.
Kun kaisa, masiling mo, “ay daw wala sila gatigulang no?”
Kaangay sa sining isa ka Lola sa Sand Springs sa Oklahoma sa Estados Unidos sang Amerika kun sa diin 100-anyos na ang iya edad subong nga adlaw, nga technically… amo man ang iya nga 25th birthday!
Bangud makaisa ka bes lamang nga nagatuhaw ang Pebrero 29 sa kada apat ka tuig, buot silingon, talagsa man ang selebrasyon ni Mary Lea Forsythe sa sulod sang isa ka siglo sini nga kabuhi.
Antes pa man ang iya nga kaadlawan subong nga adlaw, ginkilala na siya sang nonprofit organization nga Centenarians of Oklahoma.
May birthday party man para sa iya nga ginhiwat sang Daughters of the American Revolution Osage Hills Chapter kun sa diin ginbalik-balikan ang pinanid sa iya nga kabuhi bilang isa ka centenarian.
Lakip sang mga matahum nga butang nga gin-enjoy ni Lola Mary sa iya bilog nga kabuhi amo ang musical bangud gusto-gusto gid sini nga nagauyat siya sang piano kag mandolin. Ang iya paborito nga kanta amo ang “Sitting at the Feet of Jesus.”
Kilala man ini nga palabasa sang bibliya kag isa gid ka inspirasyon para sa tanan.
Magluwas diri, may yara man siya sang duha ka anak, lima ka mga apo, kag 11 ka mga apo sa tuhod.
Naka-trabaho siya bilang secretary sa law firm, nag-pursue sang real estate license, kag naka-publish man sang iya nga kaugalingon nga libro.
Trivia lang, Ka-Bombo!
Nakahibalo ka bala nga ang tyansa nga mabata sa Pebrero 29 ang yara lamang sa isa sa kada 1,461 ka tawo?
Ginapahayag man nga may yara sang lima ka miyon nga mga tawo sa bilog nga kalibutan nga nabun-ag sa sini nga espesyal nga adlaw.
Kun nagapamangkot ka kun san-o ang masunod nga Leap Year, worry no more, sabton ka namon! Matuon ini sa Martes, Feb. 29, 2028; Domingo, Feb. 29, 2032; kag ang sunod amo ang Byernes, Feb. 29, 2036!#
(Photo Courtesy: Tulsa World)
