Gin-umpisahan na sang Department of Agriculture (DA) ang imbestigasyon sa gina-alegar mga opisyal sang National Food Authority (NFA) nga nagbaligya sang linibo ka tonelada sang bugas sa ila kakuntyaba nga mga traders sa tuman ka nubo nga presyo nga nag-resulta naman sa kapyerdehan sang gobyerno.
Mismo si Agriculture Secretary Francisco Tiu Laurel Jr. ang nagtukod sang panel agud nga busision ang mga dokumento kag magpatigayon sang mga interview agud nga mabukaran gid ang kamatuoran sa gin-alegar pagbaligya sang mga rice stocks sang NFA sa mga indi pa matumod nga traders bisan nga wala nag-agi sa husto kag nakaandan nga bidding process.
Una na nadiskubrehan nga ginbaligya sang pila ka mga opisyal sang NFA ang bugas sa mga bodega sini sa presyo nga P25 kada kilo (nga wala sang bidding) apisar pa ang bakal sang ahensya sa palay pa lamang ang nagadangat na sa P23 kada kilo.
Indi lamang mga nagapungko nga opisyal ang imbestigaran kundi mangin ang mga ginpa-puwesto sang administrasyon pa ni anay President Rodrigo Duterte.
Suno kay Agriculture Assistant Secretary Arnel de Mesa, ginmandu ni Laurel ang imbestigasyon bangud madamo sang nagatinudluanay sa guwa kag sulod sang NFA, kag magluwas diri, luyag man sini mahibaluan kun matuod nga may iregularidad ukon basi kun may yara lamang sang indi paghangpanay sa sulod sang ahensya.
Sa pihak nga bahin, nag-depensa naman si NFA Administrator Roderico Bioco nga ginapahanugutan sila nga mag-dispose na sang daan na nga mga stocks sa ila nga bodega tubtub sa 10 percent nga mas manubo ipaanggid sa mandated price.
Yara ang floor price sa P22.50 per kg kag ang maximum mandated ceiling price naman ang yara sa P25 per kg.
Suno pa kay Bioco, mahimo man mapaguwa ang damaged stocks kag mahimo mabaligya sang at least P6.50 per kg.
Suportado naman sang pila ka mga mangunguma ang imbestigasyon sang DA — halimbawa, ang rice watchdog group nga Bantay Bigas nga nagsiling nga ang mandato lamang sang NFA amo ang pagbakal sang palay para sa buffer stocking para sa mga kalamidad kag emerhensya apang klaro nga wala sila ginatugtan nga magbaligya sang bugas.#
