Gin-ban sa isa ka hampang kag gindagdagan pa sang multa ang Portuguese football superstar nga si Cristiano Ronaldo bangud sa ginpahayag “bastos” sini nga sabat sa fans sa isa ka match sang Saudi Pro League.
Natabo ini kadungan sang hampang sang iya club nga All Nassr kun sa diin nagdaog ini, 3-2, batok sa Al-Shabab nga naka-base sa Riyadh.
Ang aktwasyon sang 39-anyos nga All Nassr star amo ang iya sabat sa mga fans sang Al Shabab nga nagasinggitan sang pangalan sang world champion kag long-time rival ni Ronaldo nga si Lionel Messi.
Samtang nagasinggit sang “Messi, Messi” ang mga tawo sa stands, nagliso si Ronaldo, ginbutang ang iya kamot sa iya dulunggan, kag sunod nga sulit-sulit ang iya gesture sa iya nga atubangan ukon sa pelvic area nga gintawag naman sang iban nga bastos.
Suno sa Saudi Arabian Football Federation, ginlapas ni Ronaldo ang Article 57-1 sang Discipline and Ethics Regulations.
Magluwas sa suspensyon, magabayad ini sang $2,666 (ginabanta P150,000 ) sa football federation kag dugang nga $5,333 (ginabanta P300,000 ) sa Al-Shabab para sa complaint filing fees.
Gin-athag man sang Saudi Arabian Football Federation nga indi na pwede maka-apelar si Ronaldo sa amo nga desisyon — apisar nga siya ang ginakabig pinakadaku nga football player sa amo nga pungsod.
Matandaan nga si Ronaldo, isa ka five-time Balon d’Or winner, ang nagsulod sa Al-Nassr kasunod sang iya paghalin sa Manchester United sang katapusan sang 2022.
Naka-skor siya sang 14 goals sa iya 16 ka league appearances sang nagligad nga tuig kag amo ang top scorer sa liga subong nga may 22 goals sa 20 sini ka mga pagpakita sa hampang.
Indi ini ang una nga tion nga nabutang ang pangalan sang amo nga Portuguese star sa kontrobersiya halin sang nagsaylo ini sa Saudi Arabia.
Sini lang nga bulan, nakit-an man nga ginpulot sini ang Al Hilal scarf nga ginhaboy sa iya halin sa stands, ginbutang sa sulod sang iya nga shorts, kag ginhaboy ini samtang nga nagapasulod siya sa tunnel matapos nga nalutos ang Al Nassr, 2-0, sa Riyadh Season Cup final.#
