Kilala mo bala ang ginabansagan nga pinaka-fertile nga babayi sa kalibutan?
Ini amo si Mariam Nabatanzi apang mas kilala sa pangalan nga “Mama Uganda” nga may yara sang 44 ka mga kabataan sa edad nga 40-anyos!
Mahimo nga mang-apaw-apaw ka kun mabatian mo nga 13-anyos pa lamang siya sang una nga nakaangkon sang kapid nga anak.
Pagtungtong sa edad nga 36, may yara na siya sang 42 ka iban pa nga babies….kag sa edad nga 40, diri na kag nabun-ag ang ika-44 sa iya mga bata.
Apisar daw makibot ka sa kadamuon sang iya bata, masubuan ka man kun mahibaluan mo nga ginbayaan siya sang iya bana kag isahanon niya nga ginabuhi ini nga daku nga pamilya didto sa Uganda, East Africa.
12-anyos pa lamang si Mariam sang ginbaligya siya sang iya nga ginikanan; ginkasal sa isa ka lalaki; kag nagbusong siya sa edad nga 13.
Apat ka sets ang iya kapid nga bata; lima ka sets ang triplets; lima ka sets ang quadruplets; kag isa ka bes lamang siya nga nakabata nga isahanon lang ang bata ukon wala sang kapid.
Anum sa sini nga mga bata ang napatay, kag bangud nagtal-as ang iya bana dala ang ila sinuptan nga kuwarta, nagapangabuhi si Mariam nga single parent kag may yara sang 38 ka mga bata kun sa diin 20 ang lalaki kag 18 ang babayi.
Indi man kinaandan ang medical condition ni Mariam bangud natukiban nga may yara ini sang abnormal nga kadakuon sang ovaries nga nag-resulta sa kondisyon nga hyperovulation. Suno sa doktor, indi na magsaler sa iya ang birth control pills kag posible magtuga sang mas malala nga health conditions.
Bangud tuman siya ka fertile, gin-abisuhan siya sang doktor nga kinahanglan niya nga maminata agud nga mabuhinan ang fertility levels sa iya nga ovaries.
“Her case is a genetic predisposition to hyper-ovulate — releasing multiple eggs in one cycle – which significantly increases the chances of having multiple births,” pagpaathag ni Dr. Charles Kiggundu, isa ka gynecologist sa Mulago Hospital sa Kampala.
Kasunod sini, kinahanglan pa nga utdon sang mga doctors ang iya nga uterus halin sa sulod agud nga makauntat na ini sa pagbata.
Sang nagbiya ang iya bana sang 2016, ginahimo na ni Mariam nga adlaw pati ang gab-i agud nga makatrabaho. Isa siya ka event decorator kag hairstylist kag nagahimo man sang lain-lain nga herbal medicines agud nga makahatag sang pagkaon sa iya mga bata.
Magluwas diri, suportado man siya sang mga pondo halin sa fundraising kag iban nga donations.
Nahibaluan nga bisan nga may pinasahi nga medical condition si Mariam, nakaandan nga mataas gid man ang fertility rates sa Uganda kun sa diin ang average amo ang 5.6 ka mga bata sa kada babayi nga doble pa sa world average nga 2.4 ka mga kabataan sa kada babayi.# —via Times Now
(Photo: Reuters)
