Ginalantaw nga mangin available na sa katapusan sang tuig 2024 ang bakuna sa African swine fever (ASF) — ang balatian nga nagpatay sang masobra tatlo ka milyon nga mga baboy sa bilog nga pungsod.
Suno kay Agriculture Secretary Francisco Tiu Laurel Jr., duha ka mga kumpaniya kun sa diin isa ang halin sa Vietnam kag isa ang halin sa Estados Unidos sang Amerika ang nagahingyo na sang regulatory approval halin sa Food and Drugs Administration (FDA) para sa ila nga bakuna.
Magluwas diri, may ara man sang duha ka kumpaniya halin sa Vietnam kag Thailand nga nagaplano man nga mag-apply.
Ini nga statement ni Laurel ang ginpaguwa duha ka semana matapos ginsiling sang FDA nga wala pa sila sang nabaton nga aplikasyon para sa domestic use sang bakuna para sa baboy.
2019 sang na-rekord ang una nga outbreak sang ASF sa Pilipinas kun sa diin tuman ka daku ang napierde sa hog industry kag ginbuhinan ang mga taripa agud nga makabulig sa local supply ang foreign stocks.
Sang 2023, may gintukod man ang FDA nga task force agud nga matutukan ang evaluation sang bakuna para sa sini nga balatian sa baboy diri sa pungsod.#
