Nagtimbuok pa sa P14.79 trillion ang utang sang Pilipinas as of January subong nga tuig bangud sa net issuance sang domestic securities kag epekto sang pagluya sang balor sang peso.
31.29% diri ang nautang sa luwas sang pungsod samtang 68.71% naman ang domestic borrowings.
Suno sa Bureau of Treasury, ini nga utang ang mas mataas sang P173.91 billion ukon 1.19% halin sa Disyembre 2023 kun sa diin may P14.61 trillion nga utang ang pungsod.
Nahibaluan nga masobra doble ang ginsaka sang utang sang Pilipinas sa nagligad nga pito ka tuig kag ang ginakabig pinadaku nga rason amo ang ginapondo para sa big-ticket infrastructure projects kag ang gingamit sang tion nga may pandemya.
Sa pihak sini, wala ginakabalak-an sang mga ekonomista sang gobyerno ini nga utang bangud ginasiling nga manageable gihapon ang status sini.
Una na nga ginpahayag ni Finance Secretary Ralph Recto nga nagaplano ang Marcos administration nga maghulam sang P2.46-trillion halin sa mga creditors diri sa pungsod kag sa abroad subong nga 2024 agud nga matabunan ang ginalantaw nga budget deficit nga P1.4 trillion.#
