Nagtimbuok pa sa 9.4-million ang numero sang mga Pinoy nga wala sang trabaho sang Disyembre 2023 sandig sa resulta sang survey nga ginpaguwa sang Social Weather Stations (SWS).
Ang national survey nga ginpatigayon halin sang Disyembre 8-11 sang nagligad nga tuig ang nagatiglawas sang 19.5% sang adult labor force.
Daku ang ginsaka sini ipaanggid sa 7.9 million nga na-report sa amo man nga survey sang nagligad nga Septyembre 2023.
Sa amo nga survey, nakasaad nga nagapabilin nga mas mataas ang numero sang mga babayi nga wala sang trabaho (26 porsyento) ipaanggid sa mga lalaki (15 porsyento).
Talalupangdon ang pagsaka sang joblesness rate sa Metro Manila (halin sa 19.2 percent pasaka sa 23.2 percent), Visayas (halin sa 12.2 percent pasaka sa 18 percent), kag Mindanao (halin sa 12.4 percent pasaka sa15.6 percent).
Kun basehan naman ang edad, pinakamataas ang mga 18-24 anyos (53.7 percent), ginasundan sang 35-44 anyos (20.9 percent), 25-34 anyos (19.1 percent), kag 45-anyos pasaka (12.8 percent).
Base sa SWS, ang ginatumod sang “labor force” amo ang adults (18 anyos pasaka) nga may trabaho subong amo man ang nagapangita sang trabaho.
Ang “jobless” naman amo ang mga boluntaryo nga naghalin sa ila anay trabaho, ang mga tawo nga nagapangita sang trabaho sa labing-una nga tion, kag ang mga tawo nga nadulaan sang trabaho bangud sa economic circumstances nga lapaw na sa ila nga kontrol.
Ini nga survey ang gin-conduct paagi sa face-to-face interviews sa 1,200 ka adults sa bilog nga pungsod.
Ang sampling error margins amo ang ±2.8 percent para sa national percentages, kag ±5.7 percent sa kada Metro Manila, Balance Luzon, Visayas, kag Mindanao.#
(Photo: Danny Pata)
