Nabuhi ang paglaum sang fans nga makaayo pa ang gina-alegar naghuyang na nga relasyon nanday Catriona Gray kag Sam Milby.
Ini matapos nakit-an ang duha nga magkaupod liwat kun sa diin yara man ang ila abyan nga aktor kag direktor nga si John Prats kag asawa sini nga si Isabel Oli.
Base sa picture nga naka-post Marso 10, magkaupod sila nga apat nga naghampang sang pickleball — isa ka sahi sang paddle sport nga nakadesinyo para sa duha ukon apat ka mga players.
Nahibaluan nga pila ka bulan na nga nagaguwa ang huring-huring nga sanday Cat kag Sam ang biktima man sang showbiz breakups ilabi na bangud indi na suksok sang beauty queen ang iya nga engagement ring.
Pebrero 28 sang ginkumpirma sang talent agency sang celebrity couple nga nagapangatubang matuod sila nga duha sa “pagpanghangkat” sa ila nga relasyon, apang ginahimuan pa sang aktibo nga mga tikang agud nga ma-resolba pa kag masalbar ang ila nga pag-updanay.
2020 sang ginsapubliko sang duha ang ila relasyon kag na-engage sang Pebrero 2023.#
