Nagpangayo sang pasaylo ang beauty queen nga si Megan Young sa pageant fans nga naugot sang ginkay-o sini ang buhok ni Miss Botswana Lesego Chombo sa final round sang Miss World 2024.
Si Megan nga amo ang naga-uyat sang titulo bilang Miss World 2013 ang nag-co-host sa coronation event sang amo nga beauty pageant sa Mumbai, India sang nagligad nga Sabado sang gab-i (oras sa Pilipinas).
Pag-abot sa question and answer portion, antes pa man nahaboy ang pamangkot, ginkaayo ni Megan sang makadali ang buhok sang kandidata bangud may gamay nga nagawayway sa nawong sini.
Apisar para kay Megan isa lamang ini ka gesture agud buligan ang kandidata, tuman naman ang kaugot kag pagpakamalaot sang African fans bangud ginbasol nila ang Pinay beauty queen nga na-distract ang ila nga tiglawas. Ginpasibangdan pa sang iban si Megan sang “witchcraft” ilabi na sang tubtub lamang sa Top 4 ang tiglawas sang Botswana kag nagkadto naman kay Krystyna Pyszkova sang Czech Republic ang korona.
Sa statement ni Megan, ginsiling sini nga nakaistorya na siya sang pribado kay Lesego kag nakapangayo sang pasaylo kun naglain man ang buot sini sa iya ginhimo.
Pahayag pa sang Filipina beauty queen, nahangpan niya nga indi gali ini mabaton sa kultura sang Botswana apisar pa nga wala man siya sang malain nga intensyon kag wala sang tuyo nga manghilabot sa personal space sang isa kundi magbulig gid lamang.
“I wanted to offer a helping hand but I failed to oversee the bigger picture. This could have caused distress during that moment and I have been made aware that culturally, this is unacceptable,” post sini. “To those who witnessed the incident, I also want to apologize for any discomfort or confusion my actions may have caused. It was a thoughtless and disrespectful act, and I take full responsibility for it.”
Sa separado naman nga pahayag ni Miss Botswana, nag-apelar man sa iya fans nga untaton na ang pag-bash kay Megan amo man sa winner nga si Krystyna.
“I appreciate that you are all looking out for me, but it really doesn’t make me feel good when you bring other people down in my name or for my sake. Please be kinder, please to Krystyna, to Megan, be kinder,” kabahin sang apelar ni Lesego.
Sa amo nga pageant night finals, matandaan nga lakip man sa ginkilala sanday Miss Lebanon (Yasmina Zeytoun) kag Miss Trinidad and Tobago (Ach Abrahams) bilang runners-up.#
