Ginalantaw nga magasaka sa masunod nga sinemana ang presyo sang masobra 40 ka mga produkto nga nalakip sa lista sang basic necessities and prime commodities nga gina-monitor sang Department of Trade and Industry (DTI).
Lakip diri ang instant noodles, habon, bottled water, kag iban pa nga basic items.
Suno kay Trade Assistant Secretary Amanda Nograles, magapaguwa pa sang bulletin ang ahensya sa masunod nga bulan agud nga ma-cover ang basic necessities and prime commodities nga na-review na sang price adjustment.
Ginahikot man sang ahensya ang pila ka mga pagbag-o sa timing sa release sang bulletin.
Matandaan nga sang Enero lamang sang gin-aprubahan sang ahensya ang pagsaka sa presyo sang habon, canned sardines, kag powdered milk. Sang amo nga tion, lakip sa gina-estudyuhan sang ahensya amo ang presyo sang bottled water, instant noodles, tinapay, iban nga canned products kaangay sang corned beef kag meat loaf, amo man ang kandila kag baterya.
Matandaan nga una na nga ginpahayag sang ahensya nga 2022 pa lamang, naga-petisyon na ang manufacturers nga mapasaka sila sang presyo apang ginpaiway lamang ang implementasyon bilang konsiderasyon sa mga consumer.#
