Ginalantaw nga posible mag-import ang Pilipinas sang tubtub sa 60,000 metric tons sang bombay bangud 45 porsyento sang plantasyon sa pungsod ang apektado gid sang harabas ukon armyworm infestations nga ginpalala pa sang El Niño phenomenon.
Suno sa Philippine Chamber of Agriculture and Food Inc., singko porsyento lang sang una ang ila ginalantaw nga maapektuhan sang harabas apang bangud sa tuman nga init nga rason sang pagdamo sang ulod, naglala pa ang sitwasyon.
Magluwas sa Nueva Ecija nga amo gid ang na-report nga apektado sang harabas, apektado man ang iban nga mga probinsya nga naga-produce sang bombay kaangay sang Ilocos, Pangasinan kag Mindoro.
Base sa projection sang chamber, posible nga magresulta sa 20-30 porsyento nga pagnubo sa harvest ini nga problema.
Ginalantaw man nga pananglitan mag-import gid man ang gobyerno, posible nga magsugod ini sa Mayo.
Sang 2023, ang total onion harvest sa Pilipinas ang nagdangat sa 242,000 MT, apang sa pagkamatuod suno sa chamber, dapat nga at least 262,000 MT ang kinahanglan sa bombay kada tuig.
Natalana ang peak harvest season tubtub sa Abril.
Base sa monitoring sang Department of Agriculture, ang retail price sang red onions ang nagatupa sa P60 – P120 per kilo samtang ang white onions naman ang nagatupa sa P50 – P120 per kilo.#
(Photo: Renate Sundiam, Jr.)
