Natalana nga maghimo sang rekord ang ginbansagan nga “Pinoy Aquaman” nga si Ingemar Macarine kun magmadinalag-on ini sa 10-kilometer open water swim sa Roxas City, Capiz subong nga adlaw, Marso 16.
Maga-umpisa ini 5:00 sa kaagahon halin sa Olotayan Island padulong sa People’s Park sa Barangay Baybay, Roxas City.
Pananglitan mahimo niya ini, magasaka pa ang iya rekord sa 38 open water swims diri sa Pilipinas kag mangin sa luwas sang pungsod — butang nga wala pa nahimo sang bisan sin-o nga Pinoy.
Daku man ini nga bagay sa iya bangud ini amo ang iya mangin labing-una nga open water swim sa sulod sang isa ka tuig nga nangin inactive siya bangud sa problema sa ikaayong lawas.
Sa latest post sang Filipino swimmer, ginpahayag sini nga wala na sang nagakatabo nga asthma attacks apisar sang iya training apang ang ginakabalak-an sini amo ang wind forecast kag ang mga jellyfish.
Ginpahayag man sini nga ang himuon sini subong nga adlaw ang isa man ka paagi agud nga ma-promote ang matinlo nga kadagatan — kaangay man sa iya nga advocacy sa nauna sini nga mga paglangoy. Magluwas diri, gina-promote man sini ang turismo kag ang healthy lifestyle.
Si Macarine ang nagatrabaho man bilang Provincial Prosecutor sa Bohol.
Hunyo 2023 sang nangin nangin madinalag-on man ang open water swim sini sa Masbate kun sa diin nakumpleto sini ang 10-kilometros sa sulod sang apat ka oras, 22 minutos, kag 38 segundos.#
