May isa na naman ka buhi nga pamatuod nga masarangan mo gid malab-ot ang imo handum bisan ano man ang imo itsura kag kondisyon — basta bastante lang ikaw sa determinasyon!
Ini amo ang 23-anyos nga si Ganesh Baraiya, tumandok sang India, nga nagataas lamang sang tatlo ka tapak… apang naga-trabaho bilang isa ka doktor!
Halin sang apat ka tuig pa lamang ang iya edad tubtub natubuan sang buot, nagpangatubang si Ganesh kag ang iya nga pamilya sang diskriminasyon halin sa mga tawo sa palibot.
May ara pa gani sang tion nga gintanyagan ang iya amay sang kuwarta agud nga mapa-trabaho si Ganesh bilang isa ka clown rason nga naglalain gid sila kag gin-updan na lang ang bata bisan diin ini magkadto bangud sa kakulba nga ikidnap ini sang iban kag pwersahon nga mag-trabaho kag himuon nga kalingawan.
Bisan sa eskwelahan, indi madula ang pagpakanubo—bisan ano pa ka ambisyoso kag ano pa ka taas ang grades sang bata.
Nag-apply ini sa Bachelor of Medicine and Bachelor of Surgery degree apang wala ginbaton bangud sa dwarfism.
Maayo ang resulta sang iya test apang ginbasura sang Medical Council of India ang iya aplikasyon bangud nagapati sila nga indi sini masarangan ang iya trabaho pananglitan may mga emerhensya sa ospital.
Sa bulig sang school principal, nagkadto pa gid siya sa District Collector nga amo anay ang state Education Minister kag ginpasaka pa gid ang reklamo sa Gujarat High Court.
Wala nagmadinalag-on ang iya mga gusto, tubtub nga nakalab-ot sa Supreme Court sang India ang iya kaso, kag finally, nahatagan siya sang hustisya!
Nag-desisyon ang korte nga may kinamatarong si Ganesh nga mag-enrol sa Bachelor of Medicine and Bachelor of Surgery degree — butang nga wala na sini ginpalampas, nagtutom sa pag-eskwela sa Government Medical College sa Bhavnagar, kag subong isa na ka intern sa Sir-T Hospital sa Bhavnagar.
Bisan sa trabaho, may mga pasyente nga nagapakanubo sa estado ni Ganesh apang wala ini nagapaapekto kag ginahimo na lamang sang maayo ang iya nga obligasyon.
Wala pa ginkilala sang Guinness Book of Records si Ganesh, apang ginabansagan ini sang iban nga ‘world’s shortest doctor’ — butang nga wala sini ginakahuya bangud isa ini ka representasyon kun ano ka budlay ang iya gin-agyan agud lamang malab-ot ang iya mga handum.
