Nagapati si Iloilo City Councilor Sedfrey Cabaluna nga kinahanglan sang madalum nga planning strategies sang Iloilo City Bureau of Fire Protection (BFP) agud nga indi mahubsan sang supply sang tubig subong nga tag-ilinit.
Sa interview sang Bombo Radyo kay Cabaluna, Chairman sang Committee on Public Safety and Fire, iya ginpahayag nga isa ang problema sa tubig ang ginapangatubang sang syudad ilabi na subong nga gina-eksperyensyahan ang El Niño Phenomenon.
Suno kay Cabaluna, mas makapamaayo sa BFP ang temprano nga pagplano kag pagsekyar sang water resources kun bala ini tanan ang naga-gana kag magamit sa tion sang emerhensya.
Ginpahayag man sang natungdan nga naga-koordinar sila sa ahensya agud nga mahatagan sang igtalupangod ang kakulangan sang supply sang tubig.
Matandaan nga sang nagligad nga mga semana, nagpahayag ang Iloilo City Bureau of Protection nga indi na nila masigurado kun mangin bastante pa ang supply sang tubig.
Nahibaluan nga ang BFP ang nagakuha sang supply sang tubig sa hydrant sa Barangay Tabuc Suba, Jaro, Iloilo City.
