ILOILO CITY- Patay gid ang lima ka tuig nga bata nga lalaki matapos nga nabilin ini sa sulod sang ila balay nga nasunog sa Sitio Balagon, Brgy. Badiang, Anilao, Iloilo.
Sa impormasyon nga nakuha sang Bombo Radyo, nagakatulog ang magpamilya sang nasunog ang ila balay.
Ang balay ang ginapanag-iyahan sang mag-asawa nga Garry Martinez kag Jissa Martinez nga mga myembro sang Ati community sa lugar.
Ginapahayag nga gintinguhaan pa sang iloy sang biktima nga maluwas ini apang bangud sa tuman na ka dako ang kalayo, wala na ini matabangan pa.
Nag-angkon naman sang mga sunog sa lawas ang iloy nga gilayon nga gindala sa ospital.
Nahibaluan nga nagabusong pa ang nasambit nga iloy.
Magluwas sa ila balay, nasunog man ang ila nga motorsiklo.
Wala pa matumod ang kabangdanan sang sunog.
