Nahimo nga kahalam-utan sa mata sang publiko ang isa ka babaye nga todo gid ang stretching kag yoga exercise antes sini ginsulod ang isa ka bakery kag ginkawatan.
Didto ini sa Philippa’s Bakery headquarters sa Melbourne, Australia kun sa diin kit-anon gid sa surveillance camera ang ginhimo sang babaye nga kriminal.
Lunsay itom ang suksok sini pati na ang iya nga sapatos. Halos duha ka minutos ang ginlawig sang iya nga stretching sang ‘las tres sa kaagahon antes sini dalayon na nga ginsulod ang establisyemento.
Suno sa bakery nga involved sa insidente, lakip sa ginkuha sang babaye amo ang almond croissant, isa ka pares sang sapatos, iPad, kag mga produkto nga ginagamit sa pagpaninlo.
Gin-report man sang outlet nga ginkasuhan ini sang theft kag burglary apang nakaguwa man matapos nakapyansa. Natalana ini nga mag-atubang sa Melbourne Magistrates’ Court sa Mayo 22.#
