Ginalantaw sang Department of Trade Industry (DTI) nga iimplementar na sa Lunes, Marso 25, ang dugang nga discount para sa senior citizens kag persons with disability kun magbakal sila sang grocery items.
Ini matapos nga ginbalhag na sang ahensya ang bag-o nga Joint Administrative Order nga napirmahan kaupod ang Department of Agriculture (DA) kag ang Department of Energy (DOE).
Paagi sini, mahimo na nga ma-avail sang senior citizens kag sang PWDs ang P125 weekly discount sa basic necessities and prime commodities. Mas mataas ini ipaanggid sa P65 nga limit nga amo ang ginapatuman subong.
Sa idalom sang bag-o nga regulasyon, nalakip pati ang pagbakal online.
Agud ma-avail ang discount suno sa ahensya, dapat nga magbakal ang kustomer sang at least apat ka nagkalain-lain nga items halin sa aprubado nga lista.
Nakaathag man sa bag-o nga administrative order nga ang pila ka produkto ang dapat nga locally produced ukon manufactured agud nga ma-cover sang mas daku nga discount. Lakip diri ang tinapay, meats, fresh vegetables, coffee, canned meats kag canned fish, dairy products, vinegar, fish sauce, soy sauce, laundry soap kag charcoal. Ginklaro naman sang DA nga covered pa sang discount ang imported rice, magluwas sa imported specialty rice.
Agud indi man maabusuhan ini nga patakaran, ginpahayag sang DTI nga valid lamang sa sulod sang pito ka adlaw ang authorization letters nga ginagamit sang representatives sang senior citizens kag PWDs kun sila ang nagapamakal.#
