Pareho nga sulod sa contracted weight limit kag handa na para sa eight-round super middleweight bout sa Ninoy Aquino Stadium sa Malate, Manila karon sa gab-i ang Pinoy boxer nga si Eumir Marcial kag ang Thai fighter nga si Thoedsak Sinam.
Sa official weigh-in nga ginpatigayon kahapon, nagabug-at si Marcial sang 165 pounds nga mas mamag-an kay Sinam nga nagabug-at naman sang 168 pounds.
4-0 nga may duha ka knockouts ang rekord sang 28-anyos nga Zamboangueno southpaw bilang pro-boxer samtang ang 28-anyos man nga Thai boxer ang mas may malawig nga eksperyensya nga may 23 ka daog kun sa diin 19 ang knockouts kag 13 ka kalutusan.
Apisar sini nga rekord, may yara naman sang 3-inch height kag reach advantage si Marcial batok kay Sinam.
Lunes sang nag-abot si Sinam sa Pilipinas halin sa Bangkok samtang Marso 13 naman sang nagbalik si Marcial sa Pilipinas halin sa training sini sa Las Vegas, USA.
Ini nga sambuwa ang ginakabig pinakadaku nga hampang ni Marcial sa iya pro career kag ginakabig man nga preparasyon para sa iya pagsabak sa Paris Olympics sa Hulyo-Agusto subong nga tuig kun sa diin tinguhaan sini nga makuha ang light heavyweight boxing gold.#
