Nasapwan-patay ang duha ka mga bata edad duha kag tatlo ka tuig sa sulod sang isa ka salakyan nga naka-park sa kilid sang dalan sa Barangay Malabanias, Angeles City, Pampanga.
1:50 kahapon sang hapon sang nakit-an ang mga bangkay kun sa diin sandig pa sa inisyal nga impormasyon, suffocation ang rason sang ila kamatayon.
Sa dugang nga impormasyon sang Angeles City Disaster Risk Reduction and Management Office (CDRRMO), aga pa lang sang nag-umpisa sa pagpangita ang mga ginikanan sang mga biktima.
May yara sang ginpaguwa nga CCTV footage ang barangay nga 9:30 kaina sang aga, nakit-an pa nga buhi ang duha ka bata kag nagahampang sa lugar malapit man sa kun diin sila nasapwan.
Indi ila ang salakyan nga nahamtangan sang mga bangkay suno pa sa Angeles City CDRRMO, gani nalakip sa imbestigasyon kun paano nakasulod ang duha sa amo nga Toyota Vios.
Ginahulat pa ang mangin report sang PNP-SOCO kun ano gid ang rason sang kamatayon sang duha kag kun sin-o ang may salabton.
Nagpadala man sang mensahe sang simpatiya si Angeles City Mayor Carmelo “Pogi” Lazatin Jr. kag nagpasalig nga buligan sang local government unit ang pamilya sang mga biktima.#
