Nagsugod na sa pagsaka ang presyo sang isda samtang ginapaabot ang Semana Santa.
Sandig sa pinakaulihi nga datos sang Department of Agriculture, ang presyo sang bangrus nga yara sa P140 tubtub sa P250 per kilo sang Marso 18 ang nagdangat na sa P150 tubtub P220 per kilo sang Marso 21.
Ang presyo naman sang tamudyos nga yara sa P180 tubtub P280 per kilo sang Marso 18 ang nagsaka na sa P180 tubtub P300 per kilo sang Marso 21.
Suno kay DA spokesperson Assistant Secretary Arnel De Mesa, normal lang nga nagasaka sang 10 tubtub 20% ang presyo sang isda ilabi na sa Byernes Santo kag Sabado de Gloria.
Apisar sini, wala na nagakinahanglan sang price ceiling suno sa natungdan.
Ginpasiguro man sini nga maayo ang suplay sang isda sa pungsod bangud bag-o lang nagbukas liwat ang fishing season.
Sa mga ulutanon naman, maayo man ang produksyon suno sa opsiyal kag may ginalauman man nga pagsaka sa presyo apang indi gid tuman ka daku.
Nahibaluan nga bangud kadam-an sa Pilipinas amo ang mga Katoliko, madamo man ang nagasunod sa tradisyon sa Semana Santa lakip na ang paglikaw sa pagkaon sang karne sa Ash Wednesday kag tanan nga Byernes sa lenten season.
