Naga-ugtas ang mga pulis didto sa New Orleans, Louisiana, USA bangud makumpiska matuod nila ang marijuana kun ara sa guwa, apang may ara gid sila nga indi mapunggan nga makonsumo ini kun ara na sa sulod sang evidence room!
Ang problema sang otoridad indi amo ang police officers nga abi mo adik sa droga, kundi ang mga ilaga nga amo ang pakadto-pakari sa building kag makasarang magtultol sang mga marijuana nga ginagamit sang mga pulis bilang ebidensya sa mga kaso.
Ginpahayag pa sang hepe nga si Anne Kirkpatrick sa city council meeting nga nakit-an nila nga nagaka-“high” pa ang mga ilaga bangud sa pag-it-it sang marijuana — butang nga indi kahalam-utan kundi makailinit para sa ila.
Problemado sila suno sa hepe bangud posible maapektuhan sang ilaga ang mga kaso-kriminal nga naangot sa marijuana.
Nahibaluan nga lakip man sa ginplastar sini sa criminal justice committee sang amo nga syudad amo nga indi na maayo para sa ila trabaho ang building nga ila nahamtangan nga natukod pa sadtong 1968.
Magluwas sa problema sa ilaga kag sa ila higko, lakip man sa ulugtasan suno sa iya amo ang mga tanga kag ang problema sa maintenance kaangay sang guba nga elevator kag wala nagagana nga plumbing kag amo man ang air conditioning system nga nag-collapse sang nagligad pa nga summer.
