Nagsaka na sa 18 ang numero sang patay lakip na duha ka kabataan matapos nga nagbungguanay ang dump truck kag ang isa ka depampasahero nga van sa Barangay Luhong, Antipas, Cotabato.
Sa imbestigasyon sang awtoridad, pakadto sa Antipas proper ang dump truck sang nadulaan ini sang preno kag nagbunggo sa nasugata sini nga van nga rason pa sang pagkalayo sini.
Lakip man nagkalamatay amo mismo ang driver sang van samtang nagapabilin naman sa kustodiya sang pulis ang nagadala sang dump truck kag posible nga mangatubang sang kaso nga reckless imprudence resulting to multiple physical injuries and damage to property.
Sa inisyal man nga impormasyon, may tatlo ka mga biktima nga nakaluwas sa insidente apang tuman man ka seryoso nga mga samad ang naangkon sa lawas bangud sa sunog.
May mga nakakita man sang insidente nga nagsiling nga tuman ka pwersado ang natabo nga pagbungguanay rason nga nagbaliskad ang van, nagligid kag nagtupa sa kanal sa kilid sang highway antes nagkarab-karab ang kalayo.
Padayon pa ang imbestigasyon sang otoridad sa insidente kag padayon man nga gina-identify ang 18 nga nagkalamatay.#
