Ginpangunahan nanday Anthony Davis kag LeBron James ang Los Angeles Lakers nga mahimo ang ila nga highest-scoring performance sa sulod sang 37 ka tuig paagi sa paglutos sa Indiana Pacers.
Daog ang Lakers, 150-145, kun sa diin 36 puntos kag 16 rebounds ang halin kay Davis samtang nagdugang naman si James sang 26 puntos kag 10 assists.
Nagdugang pa kuntani ang Indiana sang 46 puntos sa katapusan nga quarter apang nagbubo man ang Lakers sang 10 sa last minute nga amo ang rason sang ila ikatatlo nga sunod-sunod nga kadalag-an.
Nagapang-siyam ang Lakers sa Western Conference kag may 11 pa ka mga hampang nga nabilin sa 82-game regular season. Ang top six amo ang maka-qualify para sa end-of season play-offs, samtang ang nagapang-pito tubtub 10 amo ang magasulod sa play-in tournament.
Ang Pacers naman ang nagapang-anum sa Eastern Conference kag may 10 pa ka mga hampang nga nabilin.
Ang ila hampang sang nagligad nga gab-i amo ang labing-una nga tion nga nagkit-anay sila liwat sa court halin sang ginlutos man sang Lakers ang Pacers, 123-109, sa Las Vegas agud makuha ang kampyonato sa labing-una nga In-Season Tournament sang nagligad nga Disyembre 2023.#
Jayne Kamin-Oncea/USA TODAY Sports/Reuters
