Ginpangunahan sang Pinay Olympic champion nga si Hidilyn Diaz ang weightlifting team sang Pilipinas nga nagpadulong sa Phuket, Thailand para sa International Weightlifting Federation World Cup tournament.
Ini ang magaserbe nga katapusan sang qualifying event para sa weightlifting team para sa nagahilapit nga Paris Olympics.
Lakip sa team sang 2020 Tokyo Olympic gold medalist amo ang iya bana slash coach nga si Julius Naranjo.
Base sa IWF Paris 2024 Olympic Qualification Rankings para sa women’s 59-kilogram division (as of March 4), nagapang-walo si Diaz sa position kasunod sang iya nga pagpasakop sa World Championships sa Riyadh, Saudi Arabia kun sa diin nadala sini ang 224 kg.
Lakip man sa ginalauman nga makaupod ni Diaz sa Phuket amo ang isa ka Olympian kag weightlifting star nga si Elreen Ando, si Rosegie Ramos sa women’s 49 kg, si Vanessa Sarno kag Kristel Macrohon sa women’s 71 kg, kag John Febuar Ceniza sa men’s 61 kg.
Naka-schedule ang World Cup sa Thailand halin sa Marso 31-Abril 11.
Pananglitan maka-qualify ang 33-anyos nga si Diaz, ini na ang iya ika-lima nga sunod-sunod nga pagtapak sa Olympiada kag may tyansa man nga makadala pauli sang ikatatlo nga Olympic medal kasunod sang silver finish sa 2016 Rio De Janeiro Olympics kag historic gold medal finish sa Japan sang 2021.#
