Talagsa ka lang makakita sang tawo nga maisog nga magbunggo sa ginakabig pinaka-popular kag pinamaimpluwensya nga mga persona sa iya nga palibot!
Ilabi na kun ang gina-istoryahan amo ang mga presidente, pat-od nga daw makurog ang imo tuhod kag ang imo kaunuran!
Apang lain ang sitwasyon para sa isa ka tawo sa Texas sa Estados Unidos sang Amerika nga sa sobra niya ka dismayado bangud sa rematch nanday US President Joe Biden kag anay US President Donald Trump sa presidential elections subong nga tuig, naghanda man ini sang iya kaugalingon agud makasumpong ang duha!
Ini amo si 35 anyos nga si Dustin Ebey, isa ka Grade 7 math teacher kag isa man ka army veteran.
Nakahibalo ka bala kun ano ang iya una nga ginhimo?
Una, gin-islan niya ang iya pangalan — as in legal sini nga gin-islan ang iya pangalan — kag ginhimo ini nga “Literally Anybody Else.”
Suno kay Dustin, nakahibalo siya nga indi mahapos ang iya agyan, apang amo siya sini kahanda nga himuon ang iya kaugalingon nga “option” agud may pilian ang iban nga tawo nga indi na gusto magboto kanday Biden kag Trump!
Ginsiling man sini nga indi siya delusional kag nakahibalo man siya nga indi imposible ang iya ginahimo.
Medyo imposible gid man ang kinahanglan nga agyan ni Dustin base sa statistics bangud nga kinahanglan sini nga makatipon sang 113,151 signatures halin sa non-primary voters agud nga mabutang ang iya nga pangalan sa balota bilang isa ka independent candidate. Pananglitan mahimo gid man niya ini, kinahanglan niya ini ipasa antes ukon mismo sa May 13, 2024.
Kun indi naman mahimo, mahimo siya maka-apply bilang write-in candidate sa Texas kag iban nga U.S. states.
Lakip sa ginplastar sini nga plataporma amo ang accessible healthcare providers para sa kada American, housing affordability, kag education.
Nagaguwa ugaling nga ang iya tuyo sa pagpadalagan ang isa ka sahi sang protesta, kag wala man sang tuyo nga magdaog.
Para kay Dustin, ginapanan-aw na sini nga botohon lamang abi sang tawo kun sin-o ang daw indi tuman ka lain sa tunga sang duha ka presidente, bangud wala man sila sang choice kun sin-o gid kuntani ang ila gusto nga suportahan.
Sa pagkamatuod, wala nagaisahanon si Dustin nga nagaprotesta batok sa Trump-Biden rematch sa eleksyon subong nga tuig.
Sang Enero, may yara sang survey result nga ginpaguwa nga 70% ang nagasiling nga indi na dapat magpa-eleher pa liwat si Biden samtang 56% naman ang nagasiling nga indi man deserving si Trump nga magpa-eleher pa liwat sa amo nga posisyon.
