ILOILO CITY — Padayunon sa gihapon sang Philippine Coast Guard (PCG) ang hugot nga pagbantay sa West Philippine Sea kasunod man sa mandu ni President Ferdinand “Bongbong” Marcos Jr.
Suno kay Philippine Coast Guard Spokesperson Rear Admiral Armand Balilo, tinutuyo sang tikang nga mapabilin ang kalinong kag katawhay sang kadagatan apisar sang sunod-sunod nga pagpang-atake sang China batok sa Philippine vessels.
Ginpahayag man ni Balilo nga sa piyak sang mga insidente nga gintuga sang China, magapabilin nga lingkod ang pagserbisyo sang ila katapo sa pungsod kag sa tagsa ka Pilipino agud maprotektahan ang teritoryo sang Pilipinas.
Ginpaathag man sang natungdan sa publiko nga dapat lantawon ang kalinong kag indi kinahanglan nga magpatol sa malain nga akto nga ginabuhat sang China.
Sa idalum naman sang Executive Order No. 57, ang National Coast Watch Council ang mahimo na tawgon nga National Maritime Council (NMC) nga ginapangunahan ni Executive Secretary Lucas Bersamin.
Ang nasambit nga Council ang mangin responsable sa paghimo sang polisa kag stratehiya agud mapasigurado nga nagahugpong, may koordinasyon, kag epektibo ang mga tikang nga nagatalakay sang maritime security sang kadagatan sang Pilipinas.
Nagalaum man ang ahensya nga ang natukod nga council ang mahimo makabulig indi lang sa Ayungin Shoal kun sa diin nahamtang ang BRP Sierra Madre kundi pati sa pila man ka mga areas sang pungsod.
Matandaan nga sang Marso 23, gin-report sang Armed Forces of the Philippines (AFP) nga ang China Coast Guard ang nagbalabag sa Philippine Coast Guard sa diin nakompromisa ang mission nga madul-ong lang man kuntani sang supply sang pagkaon sa BRP Sierra Madre sa Ayungin Shoal sa West Philippine Sea.
Suno kay National Security Adviser Eduardo Año, kapin tatlo ka mga Philippine Navy ang napilasan sa nagluntad nga insidente.
Ginsundan naman ang insidente sang pagpang-atake sa gihapon sang Chinese Vessels sa diin naggamit ang mga ini sang water cannons.
