ILOILO CITY — Ginalauman sang Land Transportation Office (LTO) ang pagbalik sang minilyon ka mga Pinoy matapos ang pag-obserbar sang Holy Week subong nga tuig.
Suno kay Transportation Chief Assistant Secretary Vigor D. Mendoza II, ginmanduan na ang mga regional directors kag iban nga opisyal sang ahensya nga i-maintain ang road safety measures sa mga lugar nga posible dugukan sang mga Pinoy nga nagbyahe pabalik sa Metro Manila kag iban nga syudad sang pungsod matapos ang malawig nga Holy Week.
Nagmandu man ang natungdan sa mga ospiyal sang ahensya sang mga District Offices nga siguraduhon nga ginapatuman ang road safety measures ilabi na ang inspeksyon sa mga bus kag pasahero antes pahanugutan nga makahalin sa bus terminals.
Ginpasigurado man sang ahensya nga mapabilin ang presensya sang ila enforcers sugod subong nga adlaw, Marso 31.
Mapatuman man ang talatapan sang information drive may kaangtanan sa road safety agud mapasangkad ang ihibalo sang mga motorista sa basic safety measures.
Nagnugyan man si Mendoza nga sa publiko nga likawan ang road rage apisar sa ginalauman nga pagpugok sang trapiko entry points sang Metro Manila kag urban areas.
Kapin 52,000 naman ka mga kapulisan ang ginmanduan sang Philippine National Police nga bantayan ang dalanon agud mapabilin nga hugot ang seguridad kag safety sang motorista kag mga nagabyahe.
Matandaan nga sang Holy Week, ginpaidalum na sa heightened alert status ang kapulisan sa bug-os nga pungsod.
Samtang, ginalauman naman sang Philippine Ports Authority (PPA) ang kapin 2 million ka mga pasahero nga mapadulong sa mga pantalan sa pagbalik sa syudad agud magtrabaho matapos ang lenten season.
Nagapabilin naman nga hugot ang security measures sa airports sa pagbalik sang linibo ka mga air passengers sang domestic kag international flights.
