Ginpasalig sang Department of Agriculture (DA) nga naga-double time ini sa trabaho agud nga mapasangkad pa ang produksyon sa humay kag mapanubo ang presyo sa tunga sang nagakatabo nga inflation.
Suno kay Agriculture Assistant Secretary Arnel de Mesa, ginaplano sang ahensya ang mechanization agud nga mapanubo ang gasto sa produksyon.
Ginpaathag ini sang DA matapos nga nagsaka sa 3.7% ang inflation sang Marso bangud sa saka sa presyo sang pagkaon kag transportasyon.
Gin-ako man ni De Mesa nga may 15% tubtub 20% nga nagakausik sa post-harvest ilabi na kun ginabulad kag ginagaling na bangud ini sa variety sang humay.
Sa 18 nga existing varieties sang humay kada rehiyon, ginaplano sang DA nga himuon na lamang ini nga duha ukon tatlo agud mapasiguro nga maayo man ang sistema sa paggaling kag mas mataas ang milling recovery.
Una na nga gin-athag ni de Mesa nga wala sang plano ang ahensya nga irekomendar ang suggested retail prices (SRPs) kag price cap sa bugas apisar pa sang nakit-an nga inflation.#
(PNA photo)
