Nagdugang ang Boholana weightlifter nga si Vanessa Sarno sa lista sang mga atleta nga Pilipino nga magatiglawas sang Pilipinas sa Paris Olympics 2024.
Naka-qualify ang 20-anyos kag two-time South East Asian Games gold medalist matapos ang maayo nga performance sa women’s 71kg event sang IWF World Cup sa Phuket, Thailand kagab-i, Abril 7.
Ginguba ni Sarno ang rekord sang Pilipinas sa snatch category matapos nakahakwat sang 110 kg nga mas mabug-at sa 108 kg nga siya man ang nag-set sang nagligad nga tuig.
Sa clean and jerk, nagrehistro ang Pinay sang 135 kg kag may kabug-usan nga nadala nga 245kg.
Nagpanglima siya sa 25-man field kun sa diin ang nagpanguna amo si Olivia Reeves sang USA (268kg); nagapangaduha Guifang Liao sang China; nagapangatlo si Kuk Hyang Song sang North Korea; kag nagasunod si Wen-Huei Chen sang Taiwan.
Antes kay Sarno, ang iban pa nga Pinoy nga nakabulsa na sang ticket sa Paris Summer Games amo ang weightlifters nga sanday John Ceniza, Elreen Ando, kag Rosegie Diaz amo man sanday EJ Obiena (pole vault), Carlos Yulo kag Aleah Finnegan (gymnastics), kag Eumir Marcial, Aira Villegas, kag Nesthy Petecio (boxing).#
