Nagsungka na sa kapulisan ang lalaki nga amo ang nakit-an nga katapusan nga nakaupod sang babaye nga nasapwan-patay sa Barangay Tambong, Miagao, Iloilo.
Matandaan nga nasapwan ang lawas sang 52-anyos nga biktima nga si Marivic Felicisimo sang Abril 7 kun sa diin halos nagakaagnas na ang bangkay sini, wala sang pang-idalom nga panapton, kag naguwa sa autopsy result nga positibo nga ginhimuslan.
Ang suspek naman amo ang 26-anyos nga si Kenneth Paguntalan, residente sang amo man nga lugar, apang ginpahayag nga nagatinir sa Manila antes ang krimen.
Sa interview sang Bombo Radyo kay Police Captain Francis Donne Lomahan, hepe sang Miagao Municipal Police Station, iya ginpahayag nga nag-surrender ang suspek matapos ini nga ginkumbinse sang iya nga iloy nga una naman nga nag-kooperar sa imbestigasyon sang otoridad.
Kun maandaan, may yara sang na-recover nga closed circuit television (CCTV) footage sa Barangay Diday, Miagao sa diin nagpamiesta ang biktima sang Abril 5 kun sa diin nakit-an nga nauna ang suspek samtang nagabalikid ini kag ginatudlo-tudlo pa sang penlight ang biktima nga nagasunod sa iya sang kaagahon.
Sunod nga wala na nakapauli ang biktima, kag sang nasapwan, may yupok na ang agtang sini kag wala na sang underwear samtang nangindulaan naman ang suspek.
Sa inisyal nga pahayag ni Paguntalan, gin-ako sini nga ginkuga niya ang biktima apang wala niya ini ginhimuslan. May ginatudlo pa ini nga isa pa ka lalaki nga gina-alegar nga nagsugat sa biktima sang nagapauli na sila kag amo ini ang nakabais pa sini.
Nagapadayon pa ang imbestigasyon sang otoridad.#
