Sa masami, ang away sang magkarelasyon amo ang iban nga babaye ukon lalaki ukon ang third party sa ila nga relasyon.
Amo gani nga pinasahi gid ang ginhimo sang isa ka babaye sa Malaysia nga nagbulig pa sa pagpangita sang ikaduha nga misis para sa iya bana!
Ang rason sang babaye amo nga gusto sini nga makatutok sa iya nga karera bilang isa ka singer amo man sa iya nga personal development.
Ini amo si Azline Ariffin, 42, ukon si Ezlynn, nga popular bangud sa iya energetic kag avant-garde song nga Hi Hi Bye Bye sang 2003.
Apisar nga wala na ini sang bag-o nga mga kanta, sikat ini gihapon bangud aktibo sa Malaysian television.
Gin-ako sini nga siya kag ang iya 47-anyos nga bana ang nagkasugot sa polygamous marriage.
2021 sang sila ang ginkasal, samtang sang nagligad nga Marso, nagpakasal ang lalaki sa iya ikaduha nga misis nga 26-anyos nga doktor.
Ginpahayag pa ni Ezlynn nga iya mismo ideya nga mangita sang bag-o nga asawa ang iya bana para nga ang iya co-wife ang makaupod sa iya bana samtang nga masako naman ini sa iya nga karera.#
