Ginpaathag ni Bangko Sentral ng Pilipinas Governor Eli Remolona Jr. nga ang pagnubo sang balor sang peso ang wala nagakahulugan nga mahina ang performance sang local currency kundi bangud mabaskog lang gid ang dolyar ukon ang US currency.
Ang P57 nga baylo sang US dollar sang Martes amo na ang pinakamanubo sa sulod sang 17 ka bulan, apang kahapon, Myerkules, naghulag pa ini sa P57.18.
Gina-angot ni Remolona ini nga pagluya sang peso sa geopolitical tensions kag espekulasyon sa masunod nga mga tikang sang US Federal Reserve.
Ang pagnubo suno pa sa iya ang posible nga reaksyon sa signal ni Fed Chairman Jerome Powell nga ang rate cuts sa US ang posible nga maulihi ipaanggid sa ginalauman.
“I wouldn’t say it is performing poorly. I would say it’s adjusting to some events initially weakened along with other emerging market currencies because of what’s going on in the Middle East,” pahayag sini. “So it’s not a case of a weak peso. It’s a case of a strong dollar.”
Wala man nakit-an ni Remolona nga ang pagluya sang peso ang maka-waraant sang pag-adjust sang interest rates.
Nahibaluan nga duha ka magkasunod na nga bulan nga may pagsaka sa inflation rate, apang suno sa BSP chief, indi tuman ka daku ang adjustment sa peso agud nga maapektuhan ang inflation expectations.#
