Magapanguna ang 39-anyos nga all-time leading scorer sa NBA nga si LeBron James kag ang reigning most valuable player nga si Joel Embiid sa all-star lineup sang United States of America para sa men’s basketball sa Paris Olympics.
Sa announcement sang USA Basketball, yara man sa linyada ang teammate ni James nga si Anthony Davis, ang Phoenix Suns three-time Olympic champion nga si Kevin Durant kag ang Golden State Warriors superstar nga si Stephen Curry.
Ginhingadlan man nga makaupod sa squad sanday Bam Adebayo (Miami Heat), Devin Booker (Phoenix Suns), Anthony Edwards (Minnesota Timberwolves), Tyrese Haliburton (Indiana Pacers), Jrue Holiday (Boston Celtics), Kawhi Leonard (L.A. Clippers) kag Jayson Tatum (Boston Celtics).
Ang 12 nga myembro sang Paris “Dream Team” ang lunsay man nangin NBA All-Stars kun sa diin nalakip man ang apat ka NBA MVPs kag anum ka NBA champions.
Na-grupo ang US sa Group C kun sa diin makasumpong sini ang Serbia, South Sudan kag ang winner sang qualifying tournament sa Puerto Rico sa Agusto 3.
Ini na ang ikaapat nga Olympiada para kay James kun sa diin nadag-an sini ang bronze sang 2004 kag ang gold sang 2008 kag 2012.
Sa pihak nga bahin, apisar sang decorated career ni Curry, ini ang iya mangin labing-una nga pagtapak sini sa Olympics.
Balantayan man kun makahimo sang maragtas si Durant sa Paris. Siya kag si Carmelo Anthony lamang ang nakadaog sang tatlo ka gold medals sa men’s basketball sa Olympiada, kag pananglitan magdaog ang US subong nga tuig, si Durant ang mangin labing-una sa maragtas nga maka-apat na ka bulawan nga medalya sa men’s basketball.
Magaserbe nga coach ang Warriors head coach nga si Steve Kerr. Siya ang nagpungko nga assistant sang 2021 kun sa diin nakuha sang team ang gold sa Tokyo Summer Games.
Nakatalana ang Paris Olympics sa Hulyo 26-Agusto 11.
(Courtesy: USA Basketball/X)
