Gin-report sang Philippine Egg Board Association nga apektado man sang El Niño phenomenon ang produksyon sang itlog sa Pilipinas.
Suno kay Egg Board president Francis Uyehura, bangud sa tuman ka init, magluwas sa mga manok nga nagakapatay bangud sa heat stroke, nagahina man ang gana sang sini nga sapat sa pagkaon nga naga-resulta kun ngaa nagagamay ang size sang itlog kag paghina gid sang ila nga pagpangitlog.
Diri man kag nagakatabo ang imbalance suno sa iya kun sa diin mas madamo ang gamay nga itlog nga isa pa gid ka problema bangud mas barato ang presyo sini.
Magluwas diri, may nanotisyaran man nga pagnubo sa egg consumption kun mainit ang tyempo bangud kanselado ang klase kag indi makabalon ang mga estudyante.
Nagnubo man suno sa asosasyon ang farmgate price sang itlog nga yara lamang sa P4.50 kag P5.40 kada isa.
Nagalaum naman ang egg producers nga maga-stabilize na ang farmgate price sang itlog subong nga Mayo.
Una na nga ginpahayag sang PAGASA nga ang El Niño phenomenon ang mahimo gid makaapekto indi lamang sa tawo kundi sa livestock kag poultry farms.#
