Imbestigaran sang Energy Regulatory Commission (ERC) ang natabo nga forced outages sang pila ka power plants nga nag-resulta sang pagbatak sang red kag yellow alert status sa Luzon kag Visayas grids.
Martes sang gin-anunsyo sang National Grid Corp. of the Philippines nga may mga power plants nga naga-operate sa mas mahina nga kapasidad, kag halin sa amo nga adlaw, ginbatak ang nasambit nga mga status, gina-lift, kag ginabalik naman.
Suno naman sa komisyon, magatipon sila sang impormasyon kag i-review ang reports sang apektado nga stakeholders agud mahibaluan ang rason.
Nahibaluan nga ang mandato sang ERC amo ang mag-review sang performance sang stakeholders agud masigurado ang compliance sa requirements, maintenance kag technical standards lakip na ang pagtuman sini sa ginapahanugutan nga outage limitations.
Ginapapasa man ang power plant operators sang timelines para sa pagbalik sang nga mga operasyon.
Sa bahin sang Department of Energy, ginpahayag sang ahensya nga padayunon sini ang pag-monitor sa status sang power supply amo man ang pagpakig-angot sa generation firms para sa pag-recover sang mga planta nga may outage.
Una na nga ginpahayag nga posible nga sa yellow alert gihapon ang Luzon tubtub sa katapusan subong nga semana samtang ang Visayas naman ang posible nga napaidalom gihapon sa yellow alert tubtub sa masunod nga semana.
Nahibaluan nga gina-isyu ang yellow alert kun indi bastante ang operating margin agud malab-ot ang contingency requirement sang transmission grid.#
