Nabulsa sang Pinoy Olympian nga si Carlos Yulo ang gold medal sa parallel bars final sang 2024 FIG Artistic Gymnastics Apparatus World Cup series sa Doha, Qatar.
Kuwalipikado na nga daan si Yulo sa kumpetisyon sa gymnastics sa 2024 Paris Olympics apang ginpapag-on pa sini ang iya rekord matapos nakapagkit sang 15.200 points nga mas mataas sa Chinese Taipei nga amo ang nagpangaduha (14.966) kag Brazil nga pangatlo (14.566).
Antes ang parrallel bars, silver medalist man ang Pinoy pride sa men’s vault final matapos naka-rekord sang 15.066 points, pangaduha sa tiglawas sang Armenia.
Magluwas kay Yulo, nangin madinalag-on man sa amo nga tournament ang Filipino-American nga si Levi Jung-Ruivivar nga nag-qualify naman para sa Paris Games matapos ang silver medal finish sa uneven bars final.
Naka-rehistro ang 17-anyos nga gymnast sang 5.8 points sa difficulty kag 7.833 sa execution kag wala sang penalty rason nga nakuha ang ikaduha nga pwesto sa apparatus finals.
Magluwas kanday Yulo kag Ruivivar, una naman nga nangin kuwalipikado sa gymnastics sa Paris ang isa pa ka tiglawas sang Pilipinas nga si Aleah Finnegan.
Ang iban pa nga magatiglawas sa Pilipinas sa nagkalain-lain nga kategorya sa Olympiada amo sanday EJ Obiena, Eumir Marcial, Nesthy Petecio, Aira Villegas, John Ceniza, Elreen Ando, Vanessa Sarno, kag Rosegie Ramos.#
