ILOILO CITY- Ginaplano sang Department of Trade and Industry (DTI) nga maglunsar sang application nga ginapadalagan sang artificial intelligence (AI) agud magserbe nga giya para sa mga consumers sa presyo sang basic goods.
Suno kay Trade assistant secretary Amanda Nograles, ginatinguhaan nila nga mapadasig ang paglunsar sang E-presyo app nga may mga impormasyon gikan sa retailers, consumers kag price monitors.
Suno sa iya, ang nasambit nga app ang magapahanugot sa retailers, consumers kag price monitors nga mag- input sang presyo sang mga produkto.
Ang AI technology ang maga-filter sang gin- input nga data.
Pahayag pa ni Nograles, paagi sa AI-powered technology, magamit sang maayo ang tekhnolohiya kag ang data agud masiguro nga reliable ini kag insakto.
Paagi man sa app, mahibaluan sang consumers kun diin ang pinakabarato nga lokasyon para sa pagbakal sang basic goods.
Dugang niya, paagi sa app, mabuligan ang mga consumers nga indi magdepende sa suggested retail price (SRP) bulletin nga ginapagwa sang ahensiya.
