Maga-import ang Pilipinas sang 25,000 metriko tonelada sang frozen fish kasunod sang pagkakas ni President Ferdinand Marcos, Jr. sang non-tarrif barriers sa imported agricultural products.
Sa ginpirmahan nga memorandum ni Agriculture Secretary Francisco Tiu-Laurel Jr., nakaplastar ang guidelines para sa issuance sang certificate of necessity agud maka-import sang 25,000 MT sang frozen pelagic fish para sa wet markets umpisa sa Oktubre 1 tubtub sa Disyembre 21, 2024.
Nakasaad diri nga 80 porsyento sang maximum importable volume nga nagalab-ot sa 20,000 MT ang igahatag sa rehistrado nga importers sa commercial fishing sector.
Ang nabilin naman nga 20 porsyento sang otorisado nga importasyon ukon 5,000 metric tons ang iga-alokar sa fisheries associations kag cooperatives.
Natalana naman nga ipaguwa ang sanitary kag phytosanitary import clearances sa Septyembre 1 tubtub sa Nobyembre 30, kag natalana nga mag-abot ang produkto antes ang Enero 15, 2025.#
