ILOILO CITY — Natigayon na nga ma-inagurahan subong nga adlaw ang P449 million nga Heart and Lung Center Building sa Western Visayas Medical Center sa Mandurriao, Iloilo City.
Sa interview sang Bombo Radyo kay Senator JV Ejercito, iya ginpahayag nga ang proyekto ang natukod bangud sa nangin inisyatibo ni Iloilo City Lone District Rep. Julienne “Jam Jam” Baronda.
Suno kay Ejercito, dako ini nga bulig sa mga Ilonggo ilabi na sa paghatag sang pagtatap sa mga may balatian sa tagipusuon kag lungs sa diin indi na kinahanglan nga magluwas pa padulong sa Manila agud makapabulong.
Ginpahayag man sang senador nga ang inauguration sang six-storey building ang ginpasakopan man ni Dr. Adriano Suba-an kag pila ka mga guests.
Matandaan nga si Baronda ang nangin Chief Political Affairs Officer ni Ejercito sang 2018 sa diin nangin kahigayunan man agud matukod ang amo nga proyekto.
Dako naman ang pagpasalamat ni Baronda sa senador kag sa mga nagsuporta agud matukod ang Heart and Lung Center sa syudad.
Ginakabig naman sang mamalidha nga isa ka kadalag-an ang ospital para sa mga Ilonggo sa diin ginalauman nga makapasangkad sa healthcare system sa syudad.
Una na nga ginpatigayon ang groundbreaking sang pasilidad sang Marso 2019 sa tyempo sang labing-una nga termino ni Baronda sa kongreso.
