ILOILO CITY — Maimplementar sang bag-o nga water supply schedule ang Metro Pacific Iloilo Water sa Iloilo kasunod sang naganubo nga produksyon sang tubig.
Sa interview sang Bombo Radyo kay Mr. Angelo David Berba, Chief Operating Officer sang Metro Pacific Iloilo Water, iya ginpahayag nga ang ginpagguwa nga schedule ang mangin epektibo sugod Abril 30, 2024.
Suno kay Berba, kinahanglan nga ipatuman ang tikang agud mamanihar sang talatapan ang tubig nga gina-supply sa mga consumer bangud sa yara na lang sa 60 millions of liter per day ang ila masarangan ma-supply.
Mas manubo kun ikumpara sa normal nga lebel nga 70 to 80 million of liter per day.
Ginpahayag man ni Berba nga ang tikang ang tuyo nga mahagan-hagan ang epekto sang El Niño Phenomenon nga nagtuga man sang pagkamala sang Aganan River, Maasin Dam, kag Tigum River nga ginakuhaan sang mga water suppliers.
Nagakahangawa man ang Metro Pacific nga kun indi gilayon maimplementar ang schedule, posible nga maubosan sila sang tubig.
